Кико и Ивица под опсада

Кубење коси, вресоци, фотоапарати, љубовни пораки... вака некако изгледаше првата промоција на ексклузивците на Мак мјузик, Ивица Веловски и Христијан Тодорски - Кико. Иако за момент се изгледаше како дека од промоцијата нема да остане ништо, работата беше ставена под контрола, а младите музички надежи Кико и Ивица пред присутните ги претставија деби сингловите - "Рај и пекол" и "Ти би занела". Песните се пуштаат во исто време со спотови, кои, дознаваме, се снимени во битолскиот регион.

За љубовната тема "Ти би знаела" - песната за која музиката ја потпишува Јован Јованов, текстот е на Борче Димитров - Рафинерија, а аражманот е на Јован Јованов и Дамјан Лазаровски, Ивица зачекори по пелагониските ниви разочаран од неговата љубена. Прилепчанецот, пак, рајот и пеколот во видеозаписот ги прикажува на битолскиот Широк сокак, спортскиот аеродром и филмското Мариово, а околу него се моткаат неколку атрактивни девојки. Музиката и аранжманот на "Рај и пекол" ги потпишуваат Јован и Иван Јовановски, а текстот е, исто така, на Борче. И двата видеозаписи се изработени под режисерската палка на Дарио Јанковиќ.
"Само што почнавме да работиме со Јован и Кристијан, а веднаш имаме резултат. Стигнавме до ова", вели Кико. Ивица, пак, откри дека веќе размислува за албум: "Овој тим ќе не собере и за албум".
Кико и Ивица нема да застанат тука. Тие деновиве се подготвуваат повторно да влезат во студио, а со новите песни ќе настапат на "Охрид фест".
(Ан.Ѓ.)
Фото: Ѓ. Личовски